राधे माँ आली

राधे माँ आली
सजवून अंग अंग 
ओठास थापली लाली
सांभाळ तू स्वत:ला 
देवा राधे माँ आली

झगमगीत फॅशन करूनी 
तालात थिरकती पाय
भजनाचा सोडून ठेका 
सिनेमाचे गाणे गाय

शालीनता सोडून सारी 
शृंगार रसामध्ये न्हाली
सांभाळ तू स्वत:ला  
देवा राधे माँ आली

नखरे तिचे अफाट 
भक्तास भासती लीला
बघ इथे तुझ्या श्रद्धेचा 
बाजार कसा हा झाला

सोडून स्वर्ग तू देवा 
बघ येऊन एकदा खाली
सांभाळ तू स्वत:ला 
देवा राधे माँ आली

भक्तास सांगती सोडा 
मोह, ममता आणि माया
स्वत:च्या सजवून घेती 
हिरे - रत्नांनी काया

भक्तास उपवास यांना 
पंच पक्वान्नाची थाली
सांभाळ तू स्वत:ला 
देवा राधे माँ आली

असल्या साध्वी आणि 
आसाराम सारखे भोन्दू
भोगून देहाचे भोग 
स्वत: म्हणविती साधू

ढोंगाची यांच्या देवा 
आता पारच हद्द झाली
सांभाळ तू स्वत:ला 
देवा राधे माँ आली

- शामसुंदर सोन्नुर महाराज