‘माझ्या मुलीच्या डोक्यात जटा झाल्यामुळे तिला खूप त्रास होत होता. रात्री तिला धड झोपताही येत नव्हते. तिला होणारा त्रास पाहवत नसल्यामुळे तिच्या डोक्यातील जटा सोडविण्याचा निर्णय घेतला. महाराष्ट्र अंधश्रद्धा निर्मूलन समितीने केलेल्या मदतीमुळे तिच्या जटा सोडविण्यात आल्या आहेत. तिला आता जटांचा त्रास होणार नाही आणि पहिल्यासारखे तिचे केस वाढतील. लोकांनी त्रास दिला, तरी मुलीसाठी हिंमत करून हा निर्णय घेतला.’ अशी प्रतिक्रिया आशा कार्लेकर यांनी व्यक्त केली.
कार्लेकर यांची 22 वर्षीय विवाहित मुलगी सारिका आवारे हिच्या डोक्यातील जटा सोडविण्यात आल्या. अंनिसचे संस्थापक कार्याध्यक्ष डॉ. नरेंद्र दाभोलकर, राज्य कार्यवाह मिलिंद देशमुख यांनी याबाबत पत्रकार परिषदेत माहिती दिली.
आशा कार्लेकर शिरवळजवळील एका गावातील रहिवासी आहेत. सध्या त्या वडगाव शेरी येथे राहतात. लोकांच्या घरी धुणीभांडी करण्याचे काम त्या करतात. दीड वर्षापूर्वी त्यांच्या मुलीचे लग्न झाले. आजारपणापुळे ती माहेरी आली. अचानक एक दिवस तिच्या डोक्यात केसांचा गुंता दिसला. तो सोडविण्याचा प्रयत्न केला. मात्र सुटला नाही. त्यानंतर तिच्या डोक्यातील जटा वाढत गेल्या. वैद्यकीय उपचार केले; मात्र त्याचा फायदा झाला नाही, असे कार्लेकर यांनी सांगितले.
अंनिसच्या लोकांनी तिच्या डोक्यातील जटा काढण्यासाठी मदत करू असे सांगितले. त्यांच्या मदतीमुळे तिच्या डोक्यातील जटा सोडविण्यात आल्याचे त्यंनी सांगितले.
माझ्या डोक्यात झालेल्या जटा मला नकोच होत्या. त्यामुळे खूप त्रास होत असल्याचे सारिकाने सांगितले. मदतीबद्दल तिने सर्वांचे आभार मानले.
अंनिसच्या माध्यमातून गेल्या काही वर्षात 500-700 महिलांच्या डोक्यातील जटा सोडविण्यात आल्या आहेत. मात्र, गेल्या काही वर्षात जटा वाढण्याचे प्रमाण महिलांमध्ये पुन्हा वाढले आहे. देवीचा कोप होईल या अंधश्रद्धेपोटी महिला जटा सोडविण्यास तयार होत नाहीत. जटांमुळे त्यांना त्रास सहन करावा लागतो; मात्र त्याकडे दुर्लक्ष केले जाते. अशा महिलांना अंनिस मदत करण्यास तयार आहे. त्यांच्या जटा विनामूल्य सोडविण्यास अंनिस तयार असल्याचे डॉ. दाभोलकर यांनी सांगितले.
– विश्वास पेंडसे, पुणे